आईफोन १५ मा ब्याट्री तात्तिने समस्या, नयाँ आईओएस अपडेट ल्याउँदै एप्पल

काठमाडौं । आईफोन १५ प्रो र प्रो म्याक्समा आएको ब्याट्री तात्तिने समस्या समाधान गर्न एप्पलले आईओएस १७ मा नयाँ अपडेट ल्याउने भएको छ । फोर्ब्स तथा म्याक र्‍युमर्सका पत्रकार डेभिड फेलानलाई एक विज्ञप्ति पठाउँदै एप्पलले ब्याट्री तात्तिने समस्या नयाँ अपडेटमार्फत समाधान गर्ने उल्लेख गरेको हो ।

एप्पलका अनुसार थर्ड पार्टी एपमा हालै आएका नयाँ अपडेटका कारण सिस्टममा ओभरहिटिङको समस्या आएको छ । विशेषगरी इन्स्टाग्राम, उबर, रेसिङ गेम अश्फाल्ट नाइनः लिजेन्ड जस्ता एपमा सिस्टमले धान्नै नसक्ने अपडेट आउँदा तात्तिने समस्या आएको एप्पलले जनाएको छ ।

यिनै समस्या समाधान गर्न यी एपका डेभलपरसँग एप्पलले काम गरिरहेको म्याक र्‍युमर्सले उल्लेख गरेकाे छ । गत बुधवार इन्स्टाग्रामले नयाँ अपडेट सार्वजनिक गर्दै उक्त समस्या समाधान गरेको जानकारी दिएको छ । यसो त एप्पलले आफैंले पनि आईफोन १५ प्रो सुरुवाती दिनमा अपेक्षा गरिएको भन्दा बढी तात्तिने बताएको छ ।

विशेषगरी फोन सेट गर्दा वा डेटा रिस्टोर गर्दा ब्याकग्राउन्ड एक्टिभिटी बढ्ने भएकाले आईफोन १५ प्रो र प्रो म्याक्स तात्तिएकाे एप्पलको भनाइ छ । त्यसैले अस्थायी रूपमा नयाँ आईफोनमा यस्तो समस्या देखिनु सामान्य भएको विश्लेषकको तर्क छ ।

कतिपयले आईफोन १५ प्रो र १५ प्रो म्याक्समा कम्पनीले प्रयोग गरेको ए१७ बायोनिक चिपको पर्फर्मेन्सले गर्दा त्यस्तो समस्या आएको अड्कल काटेका थिए । जसले गर्दा सो चिपको पर्फमेन्स घटाउनुपर्ने आवाज उठिरहेको थियो । तर, एप्पल भने पर्फर्मेन्स घटाउने पक्षमा छैन । एप्पलले फोन तात्तिने समस्या सुरक्षा जोखिम नभएको र यसले पछि पनि आईफोनको पर्फर्मेन्सलाई कुनै असर नगर्ने दाबी गर्दै आएको छ ।