भोजपुरमा बम विस्फोट घटनाको जिम्मा विप्लव नेतृत्वकाे नेकपाले लियाे

भोजपुरमा सत्ता गठबन्धनकाे चुनावी सभामा भएकाे बम विस्फाेटकाे जिम्मा नेत्रविक्रम चन्द विप्लव नेतृत्वकाे नेकपाले लिएकाे छ । 

भाेजपुरकाे पौवादुङमा गाउँपालिकाको तिवारी भञ्ज्याङमा गठबन्धनकाे चुनावी सभा भइरहेकाे स्थल नजिकै आज बुधवार बम विस्फाेट भएकाे थियाे । विप्लव नेकपाका एक नेताले घटनाको जिम्मेवारी लिएका हुन् । चुनाव वहिष्कार गर्ने पार्टीको निर्णयअनुसार बम विस्फोट गराइएको उनले बताए ।

बम विस्फोटमा अरूण गाउँपालिका ४ चरम्बीका सुमन श्रेष्ठ घाइते हुनुभएकाे छ । श्रेष्ठ विप्लवकै कार्यकर्ता भएको र उनले टिफिन बक्समा विस्फोटक पदार्थ राखेर बनाएको बम झोलामै पड्किएको जिल्ला प्रहरी कार्यालय भोजपुरले जनाएको छ । 

श्रेष्ठको बायाँ खुट्टामा सामान्य चोट लागेको र इलाका प्रहरी कार्यालय तिवारी भञ्ज्याङले नियन्त्रणमा लिएको छ । 

यस चुनावी सभामा नेकपा माओवादी केन्द्रका अध्यक्ष पुष्पकमल दाहाल प्रचण्ड सम्बाेधन गरेर फर्किनुभएकाे छ । विस्फोटको बेला प्रचण्ड कार्यक्रमस्थल पुगिसक्नुभएकाे थिएन ।