पोखराको सेती नदीमा एक अर्ब रुपैयाँको लागतमा सिग्नेचर पुल निमार्ण शुरु

पोखराको सेती नदीमा बन्ने सिग्नेचर पुलको भौतिक पूर्वाधार तथा यातायात मन्त्री प्रकाश ज्वालाले शिलान्यास गर्नुभएको छ । पृथ्वी राजमार्ग अन्तर्गत पर्ने पुल निर्माण कार्य २०८२ भदौ २१ गते भित्र सम्पन्न गर्ने गरी रसुवा कन्स्ट्रक्सन प्रालिले ठेक्का पाएको छ ।

मन्त्री ज्वालाले विकास निर्माणका काम समयमा सम्पन्न नहुने समस्यालाई चिर्दै समयमै पुल निर्माण सम्पन्न गर्न निर्माण कम्पनीलाई निर्देशन दिनुभयो । उहाँले मन्त्रालय, स्थानीय सरकारबाट यसका लागि आवश्यक सहयोग हुने बताउनुभयो ।

मुग्लिन–पोखरा राजमार्ग सुधारको पहिलो चरणको योजना अन्तर्गत पुल निर्माण शुरु गरिएको हो । सेती नदीमा अहिले रहेको पुलको दायाँ बायाँ दुईरदुई लेनका दुई वटा पुल बन्ने सडक विभागका महानिर्देशक सुशीलबाबु ढकालले जानकारी दिनुभयो । राजमार्ग ६ लेनमा विस्तार हुँदैछ त्यसै अनुसार सेती नदीमा पनि छ लेनको पुल बन्ने महानिर्देशक ढकालले बताए ।

निर्माण कम्पनी रसुवा कन्स्ट्रक्सनका साइट इन्जिनियर सुदर्शन देवकोटाले तोकिएको समय भित्र पुल निर्माण सम्पन्न गर्ने प्रतिबद्धता व्यक्त गनुभयो । उहाँले निर्माण स्थलमा भएका भौतिक संरचना हटाइ साइट क्लियर गरिदिन पनि आग्रह गनुभयो ।

‘केबल–स्टेड’ प्रविधिका दुवै पुलको लम्बाइ १९०र१९० मिटर रहने छ । २०७९ साउनमा ठेक्का सम्झौता भए पनि डिजाइन स्वीकृत गर्न र निर्माणस्थल क्लियर नहुँदा ढिलो गरी काम शुरु भएको देवकोटाले बताउनुभयो ।

पुलको लागत भ्याट सहित १ अर्ब ७ करोड रहेको छ । एसियाली विकास बैंकको आर्थिक सहयोगमा राजमार्ग स्तरोन्नतिको काम दुई खण्डमा विभाजन गरेर निर्माण भइरहेको छ । राजमार्ग स्तरोन्नतिको काम भने निकै सुस्त गतिमा भइरहेको छ ।

पुल निर्माणको कार्य २०८१ भदौ २१ गते भित्र सम्पन्न गर्ने गरी रसुवा कन्स्ट्रक्सन प्रालिले ठेक्का पाएको छ । अहिले भइरहेको पुलको दायाँबायाँ एक–एक वटा पुल निर्माण हुनेछ ।